Қазақстанда 100 мың га жасанды ормандар құрылады
ҚР Экология және табиғи ресурстар министрлігі мен First Carbon Group Ltd. компаниясы орман-климаттық жобалар және көміртегі бірліктері саласындағы ынтымақтастық туралы меморандумға қол қойды.
Қазақстанның Экология және табиғи ресурстар министрлігі мен First Carbon Group Ltd. компаниясы өзара түсіністік туралы меморандум жасасты. Құжат орман-климаттық жобалар және көміртегі бірліктері саласындағы ынтымақтастықты көздейді.
Меморандум аясында 100 мың гектар аумақта жасанды ормандар құру жоспарлануда. Бұл көмірқышқыл газының сіңірілуін арттыруға мүмкіндік береді және көміртегі бейтараптығына қол жеткізуге ықпал етеді.
Тараптар орман өсіру жобаларын бірлесіп әзірлеуге және іске асыруға, сондай-ақ көміртегі бірліктерімен сауда механизмдерін енгізуге ниет білдіруде. Бұл елдегі «жасыл» экономиканы дамытуға бағытталған қадам болмақ.
Меморандум халықаралық ынтымақтастық аясында қол қойылды және Қазақстанның экологиялық бастамаларына инвестиция тарту үшін жаңа мүмкіндіктер ашады.