Қазақстан көмір генерациясына 7,5 трлн теңге тартады
2026–2030 жылдарға арналған көмір генерациясын дамыту жөніндегі ұлттық жоба аясында 8 жаңа энергия көзін салу және 11 жұмыс істеп тұрған энергия көзін жаңғырту жоспарлануда. Бюджеттен тыс инвестициялар көлемі кемінде 7,5 трлн теңгені құрайды.
Қазақстан Үкіметі 2026–2030 жылдарға арналған «Көмір генерациясын дамыту» ұлттық жобасын бекітті. Оның аясында сегіз жаңа энергия көзін салу және он бір жұмыс істеп тұрған энергия көзін жаңғырту көзделген.
Жобаны іске асыруға кемінде 7,5 трлн теңге бюджеттен тыс инвестиция тарту жоспарлануда. Қаражат қуаттарды жаңартуға және көмір генерациясының тиімділігін арттыруға бағытталады.
Жоба елдің энергетикалық қауіпсіздігін қамтамасыз етуге және жабдықтардың тозуын азайтуға бағытталған. Жаңғырту электр энергиясын өндіруді арттыруға және беру кезіндегі шығындарды азайтуға мүмкіндік береді деп күтілуде.
Құрылыс үшін нақты алаңдар және жаңғыртылатын объектілердің тізбесі жобаны іске асыру барысында айқындалатын болады. Қаржыландыру бюджет қаражатын тартпай, жеке инвесторлар есебінен жүзеге асырылады.